လူတွေအချင်းချင်း ဆက်သွယ်ပြောဆိုဖို့ လူ့ရဲ့နှုတ်ကထွက်လာတဲ့ အဓိပ္ပါယ်ရှိတဲ့ အသံ(သို့မဟုတ်) စကား ….။ အဲဒီစကားလေးတွေကြောင့် လူတွေပျော်ရွှင်ရသလို အဲဒီစကားလေးတွေကြောင့်ပဲ လူတွေငိုကြွေးကြရတယ်။ သင်လည်း စကားတွေပြောနေတဲ့ လူတစ်ယောက်၊ ကျွန်မလည်း စကားတွေပြောနေတဲ့ လူတစ်ယောက်။ ဒီလိုဆိုရင် ကျွန်မတို့ ဘယ်လိုစကားတွေ ပြောကြမလဲ ???.. အခြားသူတွေကို ပျော်ရွှင်စေတဲ့ စကား၊ တန်ဖိုးရှိတဲ့ စကား၊ အဓိပ္ပါယ်ရှိတဲ့ စကားတွေ ပြောမလား၊ ဒါမှမဟုတ် စိတ်ညစ်စေတဲ့ စကား၊ ပေါ့ပျက်ပျက် စကား၊ မကြားဝံ့ မနာသာ စကားတွေ ပြောမလား။ ကိုယ်ကိုယ်တိုင်ရော ဘယ်လိုစကားမျိုးလေးတွေ ကြားချင်မလဲ… အထွေအထူး စဉ်းစားနေစရာတောင် မလိုလောက်အောင် လူတိုင်းက တန်ဖိုးရှိပြီး နားဝင်ချိုတဲ့ စကားမျိုးကိုပဲ ကြားချင်ကြမှာပါ။ ဒါဆိုရင် ကျွန်မတို့လည်း သူများကို တန်ဖိုးရှိပြီး နားဝင်ချိုတဲ့ စကားမျိုးပဲပြောရမှာပေါ့နော်… ကိုယ်ချင်းစာတရားရှိရမယ်လေ။ “နှုတ်ချိုလျှိုတစ်ပါး” ပေါ့ရှင်။ ငယ်ငယ်ကလည်း မြန်မာဖတ်စာမှာ သင်ခဲ့ကြရပါတယ်..
“တစ်ယောက်စကား ..xxx.. တစ်ယောက်နားမှာ ..xxx.. မခါးရအောင် ..xxx.. သတိဆောင်၍ ..xxx.. မောင်တို့ဆိုလေ ..xxx.. ပျားသကာသို့ ချိုလှစေ” တဲ့။
တစ်ကယ်တော့ စကားလုံးလေးတွေဖြစ်လာဖို့ ရင်ထဲကခံစားပြီး ဦးနှောက်ကစေခိုင်းလို့ အာခေါင်၊ လည်ချောင်း၊ လျှာ၊ နှုတ်ခမ်းတို့က လှုပ်ရှားကြရတာပါ။ ဒီလိုဆို စကားလုံးတွေရဲ့ ရေသောက်မြစ်က စိတ်နှလုံးသားပေါ့..။ ဟုတ်တယ်.. ဒါကြောင့် စိတ်ကိုရှင်းရှင်းလေးထားပြီး စကားကို ရိုးရိုးသားသားလေး ပြောကြရအောင်။ ရင်ထဲက ပြောချင်တဲ့ စကားတွေကို ဦးနှောက်ကစိစစ်ပြီးမှ နှုတ်ဖျားကထုတ်လွှတ်ကြရအောင်လေ။ သတိတရား လက်ကိုင်ထားပြီး စကားကို ဆင်ဆင်ခြင်ခြင် ပြောကြမယ်ဆိုရင် တစ်ဦးနဲ့တစ်ဦး အထင်အမြင်လွဲခြင်း၊ စိတ်ဆိုးနာကျည်းခြင်းတွေ မရှိဘဲ လူမှုဆက်ဆံရေးတွေမှာ အဆင်ပြေမယ်လို့ ယုံကြည်ပါတယ်။ ကိုယ်ကလည်း ရိုးသားစွာပြောတဲ့ အပြင် သူများအပြောကိုလည်း အထအန မကောက်ပဲ ရိုးရိုးပဲတွေးလိုက်ပါ။ စကားတိုင်းကို မကောင်းတဲ့ဘက်က တွေးနေရင် သင့်ရဲ့စိတ်တွေလည်း ကြည်လင်နေမှာ မဟုတ်တော့ဘူးလေ။ ပုထုဇဉ်လူသားတိုင်းမှာ အတ္တ၊ မာန ကိုယ်စီတော့ ရှိကြတာပေါ့။ ဒါကြောင့် ကိုယ့်ကိုပြောလာရင် မခံနိုင်မယ့်စကားမျိုး သူများကိုလည်း မပြောပါနဲ့လို့ အကြံပြုပါရစေ။
အတင်းအဖျင်းစကား၊ ကုန်းတိုက်စကား၊ တင်စီးကြောမောစကား၊ နှိမ့်ချလှောင်ပြောင်စကား၊ ဝါကြွားဂုဏ်ဖော်စကား၊ မုသားလိမ်လည်စကား စတာတွေဟာ လောကီရေးအရ ကြည့်မယ်ဆိုရင်လည်း အင်မတန်အောက်တန်းကျသလို လောကုတ္တရာရေးအရ ကြည့်ပြန်ရင်လည်း ငရဲရောက်ကြောင်း အကုသိုလ်တရားတွေပါပဲ။ ” ခြေချော်လျှင် လဲရုံမျှ၊ နှုတ်ချော်လျှင် ငရဲဘုံကျ” လို့အဆိုရှိပါတယ်။ ဒါ့အပြင် ”စကားစကား ပြောပါများ၊ စကားထဲက ဇာတိပြ” ၊ ” ကြမ်းကျွံလျှင် နှုတ်လို့ရတယ်၊ စကားကျွံလျှင် နှုတ်လို့မရ” ၊ ”ဆိုခဲစေ၊ မြဲစေ” ၊ ”စကားနည်း၊ ရန်စဲ” စတဲ့ စကားပုံတွေ၊ ဆိုရိုးတွေဟာလည်း စကားကိုဆင်ခြင် ပြောဆိုကြဖို့ အသိပေးထားခြင်း ဖြစ်ပါတယ်။ ကိုယ်ပြောတဲ့ စကားရဲ့အဓိပ္ပါယ်ကို ကိုယ်သိရပါမယ်။ တည်ကြည်တဲ့စကား၊ သိက္ခာရှိတဲ့စကား ဖြစ်ရပါမယ်။ ကိုယ်ပြောတဲ့စကားကို ကိုယ်တာဝန်ယူနိုင်ရပါမယ်။ ပျော်စေပျက်စေ စနောက်တာမျိုး ဆိုရင်တောင် တစ်ပါးသူမနစ်နာစေအောင် ထိန်းသိမ်းရပါမယ်။ စကားတွေဟာ ပြောသူရဲ့အဆင့်အတန်းနဲ့ ကိုယ်ကျင့်သိက္ခာကို ဖော်ပြနေတဲ့အတွက် သတိထားပြောဆို ကြပါစို့ရှင်။
Monday, June 22, 2009
Subscribe to:
Post Comments (Atom)
ကြိုက်တယ်ဗျာ....................ဆင်ချင်မှ ဖြစ်တော့မယ်.
ReplyDelete