ကျွန်မဘဝမှာ ပွဲနေပွဲထိုင်အခမ်းအနားတွေနဲ့ပတ်သက်ပြီး အမှတ်တရအလွဲလေးတွေရှိခဲ့တယ်။ ကျွန်မနှစ်တန်းအရွယ်လောက်မှာ အမေ့ဘက်ကအမျိုးတွေစုပြီး ရှင်ပြုပွဲအကြီးအကျယ်လုပ်ကြတယ်။ အဲဒီခေတ်က အခမ်းအနားတွေမှာ ဗွီဒီယိုရိုက်တာ စပြီးခေတ်စားကာစအချိန်။ ဒီပွဲကိုလည်း ဗွီဒီယိုရိုက်မှ ခေတ်မီမှာပေါ့။ ဒီတော့ တစ်မျိုးလုံးတစ်ဆွေလုံး ပြိုးပြိုးပျက်ပျက်တွေဝတ်ကြပါလေရော။ ကျွန်မလည်းရွှေအိုရောင်ဂါဝန်လေးနဲ့ လှလို့။ ဒါပေမဲ့… ဒါပေမဲ့.. ကျွန်မရဲ့အလှတွေမပေါ်လွင်ခဲ့ပါဘူး။ ဘာဖြစ်လို့လဲဆိုတော့ ကျွန်မက ဗွီဒီယိုထဲ ပါချင်လွန်းလို့ ကင်မရာမင်းသွားသမျှနောက်ကို ဟိုပြေးဒီပြေး လျှောက်လိုက်နေတာနဲ့ပဲ မြောက်သစ်ကိုင်းလွတ်ဖြစ်ခဲ့လို့ပါ။ အခွေထွက်လာလို့ ကြည့်ကြတော့ ဟိုပြေးဒီပြေးနဲ့ ဂါဝန်အစွန်းလေးပဲ ရိပ်ကနဲ ရိပ်ကနဲ (သေချာပါတယ်လေ.. ရွှေအိုရောင်ဂါဝန်လေး) ။ ထုံးစံအတိုင်း ကျွန်မရဲ့အဖြစ်ဟာသူတို့အတွက် ရယ်စရာဖြစ်ရပြန်ပြီ။ အမျိုးတွေစုံတိုင်း ဒီအခွေကိုကြည့်ကြည့်ပြီး ရယ်ကြတယ်။
အထက်ပါကိစ္စက ငယ်သေးလို့ထားလိုက်အုံး။ ကြီးကောင်ကြီးမားကျမှ လွဲတာတွေကတော့……. ကျွန်မတတိယနှစ်မှာ ကျွန်မရဲ့ကျောင်းနေဖက်အစ်မတစ်ယောက် IBC မှာမင်္ဂလာဆောင်လို့ ကျွန်မက မင်္ဂလာပန်းကုံးဗန်းကိုင်ပေးရတယ်။ သိမ့်(သူလဲအတန်းထဲကကျွန်မတို့သူငယ်ချင်းပဲ)က မင်္ဂလာပန်းကြဲရတယ်။ လက်ထပ်လက်စွပ်ဗန်းကိုင်တာနဲ့ အရံတွေကတော့ အစ်မတို့အမျိုးတွေထင်တယ်။ ပန်းကြဲ၊ ဗန်းကိုင်တွေရော အရံတွေပါ အားလုံးဆင်တူလေးတွေနဲ့ လှချင်တိုင်းလှနေကြတာပေါ့လေ။ မိတ်ကပ်ကလည်း နာမည်ကြီး ခင်စန်းဝင်း။ သတို့သားဘက်ကရော အစ်မဘက်ကပါ အသိုင်းအဝိုင်းကြီးကြလို့ မင်္ဂလာပွဲဟာ အတော်လေးကို စည်ကားပါတယ်။ အစ်မနဲ့အရမ်းရင်းနှီးတဲ့ ကျောင်းကအတန်းသူ အတန်းသားတွေလဲလာကြတယ်။ သူတို့တွေလား… အကုန်လုံးကကျွန်မနဲ့ခင်တဲ့သူတွေပဲလေ။ ကျောင်းက ဆရာ၊ ဆရာမတွေလဲပါရဲ့။ အခမ်းအနားမှူးဦးကျော်စိုးဦးက ပွဲတက်ခါနီးမှ ရောက်လာတယ်။ ပြီးတော့ ပွဲထွက်ရမယ့်အစီအစဉ်တွေကို ခပ်မြန်မြန်လေးပြောသွားတယ်။ ကျွန်မကထင်ထားတာ ရီဟာဇယ်အရင်လုပ်ပြီးမှ ပွဲထွက်ရမယ်ပေါ့။ ခုတော့ဒီလိုမဟုတ်ပေါင်.. တန်းပြီးထွက်ရမှာတဲ့။ ကိစ္စမရှိပါဘူးလေ.. ကိုယ်ကရှေ့ဆုံးကမှမဟုတ်တာ။ ဘာမှလွဲစရာမရှိဘူး။ တစ်ကယ်တမ်း ပွဲထွက်တော့ရင်တွေတုန်လာတယ်။ ဘေးဘီဝဲယာမှာ ကျောင်းကလူတွေလေ။ ခြေလှမ်းမှားလို့မရဘူး .. ဒင်းတို့ဝိုင်းဟားကြမှာ။ ဟယ်.. ပြောရင်းဆိုရင်း သိမ့်က လုပ်ပြီ။ ပန်းတွေကို လမ်းတစ်ဝက်နဲ့တင် အကုန်ကြဲပစ်တာ ကျန်တဲ့လျှောက်လမ်းတစ်ဝက်မှာ ကြဲစရာမရှိတော့ဘူး။ ဒါကိုဒင်းက ဟန်မပျက်အောင်ဆိုပြီး ဘာမှမပါပဲနဲ့ လက်ကလေးနဲ့ကြဲဟန်ပြပြီး ဆက်လျှောက်သွားတယ်။ ထင်တဲ့အတိုင်း ဟိုကောင်တွေတခွိခွိရယ်သံကို ကြားနေရပြီ။ စင်ပေါ်တက်ခါနီးကျတော့ သတို့သား၊ သတို့သမီး နဲ့ အရံတွေပဲတက်ရတယ်။ ကျွန်မတို့က အောက်နားမှာစောင့်နေရပြီး ပန်းကုံးစွပ်ပေးမဲ့ လူကြီးတွေ တက်ခါနီးမှ ဦးကျော်စိုးဦးကခေါ်မှာ။ ဟော.. ခေါ်ပြီ။ ကျွန်မရင်တထိပ်ထိပ်နဲ့ တက်သွားတယ်။ ပြီးတော့ ဝင်ထိုင်လိုက်တယ်.. သတို့သားဘေးမှာ။ သတို့သမီးက ကျွန်မကိုမျက်နှာရိပ်မျက်နှာကဲပြပြီး ပါးစပ်ကလေးလှုပ်ရုံ လှမ်းပြောတယ် “ ညီမ မထိုင်ရဘူးလေ.. ဘေးမှာရပ်နေရမှာ“ တဲ့။ သတို့သားကလည်း ပြုံးစိစိဖြစ်သွားတယ်။ ကျွန်မလည်းကမန်းကတမ်း ထရပ်လိုက်တယ်။ ဦးကျော်စိုးဦးက အနားကိုမသိမသာကပ်လာပြီး “ သမီးကဘာလို့ထိုင်လိုက်ရတာလဲ.. သတို့သားဘေးမှာပဲ ရပ်နေရမှာလေ“ တဲ့ ။ ဟွန်း.. အစကတည်းက စောစောလာပြီး သေချာပြောပါလားလို့။ ပွဲမထွက်ခင် သူကပြောတော့ သမီးနာမည်ခေါ်ရင် တက်လာပြီး သတို့သားဘေးမှာနေရာယူရမယ် တဲ့။ သတို့သားဘေးမှာ မတ်တပ်ရပ်နေရမယ် လို့ရှင်းရှင်းလင်းလင်းပြောပါလား။ ခုတော့.. စင်မြင့်ထက်မှာ အရှက်ရစရာတွေဖြစ်ကုန်ပြီ။ ရှက်လိုက်တာနော်။ ဝတ္ထုတွေထဲမှာရေးထားသလို အဲဒီအချိန်မှာကျွန်မလေ ရေငွေ့လေးအဖြစ်ကွယ်ပျောက်သွားချင်ခဲ့တယ်။ ရှက်လွန်လွန်းလို့။ နောက်နေ့ ကျောင်းဖွင့်တော့ ဒီသတင်းဟာ hot news တစ်ပုဒ်ပေါ့ရှင်။ သူငယ်ချင်းတွေက “နင်ဒီလိုအတင်းနေရာဝင်လုဖို့တော့ မကောင်းပါဘူး၊ အစ်မမျက်နှာကိုထောက်အုံးမှပေါ့“ ဆိုပြီးတစ်မျိုး၊ “လိုချင်ပွင့်ပွင့်လင်းလင်းပြောပေါ့.. အခုတော့အားလုံးစိတ်ညစ်ရတာ“ ဆိုပြီး ထွန်းအိန္ဒြာဗိုလ်သီချင်းနဲ့ကတစ်ဖုံ၊ သတို့သမီးကလည်း “ကြည့်စမ်း နင်တို့တွေဇာတ်လမ်းရှိခဲ့မှန်းခုမှသိရတယ်” ဆိုပြီးတစ်မျိုး ဝိုင်းစကြပါလေရော။ ခံရမှာပဲလေ.. တုံးတာကိုး ။
Subscribe to:
Post Comments (Atom)
No comments:
Post a Comment